[1534] Devā na jīranti yathā manussā gattesu tesaṃ valiyo na honti suve suve bhiyyatarova tesaṃ Dibbo ca vaṇṇo vipulā ca bhogā.

[1535] Kiṃsūdha bhītā janatā anekā maggo ca nekāyatanappavutto pucchāmi taṃ yakkha mahānubhāva kattha ṭhito paralokaṃ na bhāye.

[1536] Vācaṃ manañca paṇidhāya sammā kāyena pāpāni akubbamāno bahunnapānaṃ gharamāvasanto saddho mudū saṃvibhāgī vadaññū saṅgāhako sakhilo saṇhavāco ettha ṭhito paralokaṃ na bhāye.

[1537] Anusāsasi maṃ yakkha yathā mātā yathā pitā uḷāravaṇṇa pucchāmi ko nu tvamasi subrahā.