[1538] Udayohamasmi kalyāṇi saṅkaratthāyidhāgato āmanta kho taṃ gacchāmi muttosmi tava saṅkarā.

[1539] Sace kho tvaṃ udayosi saṅkaratthāyidhāgato anusāsa maṃ rājaputta yathāssa puna saṅgamo.

[1540] Atipatati vayo khaṇo tatheva ṭhānaṃ natthi dhuvaṃ cavanti sattā parijīyati adhuvaṃ sarīraṃ Udaye mā pamāda carassu dhammaṃ. Kasiṇā paṭhavī dhanassa pūrā ekasseva siyā anaññadheyyā taṃ vāpi jahāti avītarāgo udaye mā pamāda carassu dhammaṃ. Mātā pitā ca bhātaro ca bhaginī bhariyā sāmiko sadhanena hoti te vāpi jahanti aññamaññaṃ udaye mā pamāda carassu dhammaṃ. Kāyo parabhojananti viditvā saṃsāre sugatī ca duggatī ca ittaravāsoti jānitvā udaye mā pamāda carassu dhammaṃ.

[1541] Sādhu bhāsati yaṃ yakkho appaṃ maccāna jīvitaṃ kasirañca parittañca tañca dukkhena saṃyutaṃ sāhaṃ ekā pabbajissāmi hitvā kāsiṃ surundhananti. Udayajātakaṃ catutthaṃ. ---------