[1721] Mitte tasseva bhajati amitte tassa na sevati akkosante nivāreti vaṇṇakāme pasaṃsati.

[1722] Guyhañca tassa akkhāti tassa guyhañca gūhati kammañca tassa vaṇṇeti paññamassa pasaṃsati.

[1723] Bhave ca nandati tassa abhave tassa na nandati acchariyaṃ bhojanaṃ laddhā tassa uppajjate sati tato naṃ anukampati pahāsopi labheyyito.

[1724] Iccete soḷasākārā mittasmiṃ supatiṭṭhitā yehi mittañca jāneyya disvā sutvā ca paṇḍitoti. Mittāmittajātakaṃ dasamaṃ. ----------- Tassuddānaṃ lahucitta sasāla kasanti puna atha kāma dasakhaluṭṭhānavaro atha kaṇha sukosiya meṇḍavaro padumo puna mittavarena dasa. Dvādasanipātaṃ niṭṭhitaṃ.