[1907] Kharājinā jaṭilā paṅkadantā dummakkharūpā ye mantaṃ japanti kacci nu te mānusake payoge idaṃ vidū parimuttā apāyā.

[1908] Pāpāni kammāni kareyya rāja bahussuto ce na careyya dhammaṃ sahassavedopi na taṃ paṭicca dukkhā pamuñce caraṇaṃ apatvā.

[1909] Sahassavedopi na taṃ paṭicca dukkhā pamuñce caraṇaṃ apatvā maññāmi vedā aphalā bhavanti sasaṃyamaṃ caraṇaññeva saccaṃ.

[1910] Naheva vedā aphalā bhavanti sasaṃyamaṃ caraṇaññeva saccaṃ kittiñca pappoti adhicca vede santiṃ puṇeti caraṇena danto.