[1946] Samaṇe brāhmaṇe cāpi aññe cāpi vaṇibbake tappemi annapānena sadā payatapāṇinī. Etena saccavajjena putto uppajjataṃ ise musā me bhaṇamānāya muddhā phalatu sattadhā.

[1947] Cātuddasiṃ pañcadasiṃ yā ca pakkhassa aṭṭhamī pāṭihāriyapakkhañca aṭṭhaṅgasusamāhitaṃ uposathaṃ upavasāmi sadā sīlesu saṃvutā. Etena saccavajjena putto uppajjataṃ ise musā me bhaṇamānāya muddhā phalatu sattadhā.

[1948] Sabbeva te dhammaguṇā rājaputti yasassini saṃvijjanti tayi bhadde ye tvaṃ kittesi attani. Khattiyo jātisampanno abhijāto yasassimā dhammarājā vedehānaṃ putto upajjate tava.

[1949] Dummi rajojalladharo aghe vehāyasaṇṭhito manuññaṃ bhāsase vācaṃ yaṃ mayhaṃ hadayaṅgamaṃ. Devatā nusi saggamhā isi vāpi mahiddhiko ko vāsi tvaṃ anuppatto attānaṃ me pavedaya.