[1950] Yaṃ devasaṅghā vandanti sudhammāya samāgatā sohaṃ sakko sahassakkho āgatosmi tavantike. Itthiyo jīvalokasmiṃ yā honti samacārinī medhāvinī sīlavatī sassudevā patibbatā. Tādisāya sumedhāya sucikammāya nāriyā devā dassanamāyanti mānusiyā amānusā. Tvañca bhadde suciṇṇena pubbe sucaritena ca idha rājakule jātā sabbakāmasamiddhinī. Ayañca te rājaputti ubhayattha kaṭaggaho devalokūpapatti ca kitti ca idha jīvite. Ciraṃ sumedhe sukhinī dhammamattani pālaya esāhaṃ tidivaṃ yāmi piyaṃ me tava dassananti. Surucijātakaṃ chaṭṭhaṃ.