[1955] Matāna maṃsāni bahū susāne manuññarūpaṃ tava bhojanetaṃ khuddaṃ pipāsaṃ adhivāsayanto kasmā bhavaṃposathiko sigāla .

[1956] Pavissa kucchiṃ mahato gajassa kuṇape rato hatthimaṃsesu giddho uṇho ca vāto tikhiṇā ca rasmiyo te sosayuṃ tassa karīsamaggaṃ. Kīso ca paṇḍū ca ahaṃ bhadante na me ahu nikkhamanāya maggo mahā ca megho sahasā pavassi so temayi tassa karīsamaggaṃ. Tato ahaṃ nikkhamisaṃ bhadante cando yathā rāhumukhā pamutto tasmā ahaṃposatha pālayāmi lobho mamaṃ mā punarāgamāsi.

[1957] Vammikathūpasmiṃ kipillikāni nippothayanto tuvaṃ pure carāsi khuddaṃ pipāsaṃ adhivāsayanto Kasmā bhavaṃposathiko nu accha .

[1958] Sakaṃ niketaṃ atiheḷayāno atricchatāya malataṃ agacchiṃ tato janā nikkhamitvāna gāmā kodaṇḍakena paripothayiṃsu maṃ. So bhinnasīso ruhiramakkhitaṅgo paccāgamāsiṃ sasakaṃ niketaṃ tasmā ahaṃposatha pālayāmi atricchatā mā punarāgamāsi.