[1969] Ettheva te nīhatā hīnavādā ahetukā ye na vadanti kammaṃ tathā phalaṃ sukatadukkaṭānaṃ dattupaññattaṃ ye ca vadanti dānaṃ.

[1970] Addhā hi saccaṃ vacanaṃ tavetaṃ kathañhi dānaṃ aphalaṃ bhaveyya tathā phalaṃ sukatadukkaṭānaṃ dattupaññattañca kathaṃ bhaveyya. Kathaṅkaro kintikaro kimācaraṃ kiṃ sevamāno kena tapoguṇena akkhāhi me morarājetamatthaṃ yathā ahaṃ no nirayaṃ pateyyaṃ.

[1971] Yekeci atthi samaṇā paṭhabyā kāsāyavatthā anagāriyaṃ caranti pātova piṇḍāya caranti kāle vikālacariyā viratā hi santo. Te tattha kālenupasaṅkamitvā Pucchāhi yaṃ te manaso piyaṃ siyā te taṃ pavakkhanti yathāpajānaṃ imassa lokassa parassa catthaṃ.

[1972] Tacaṃva jiṇṇaṃ urago purāṇaṃ paṇḍupalāsaṃ harito dumova esappahīno mama luddabhāvo jahāmahaṃ luddakabhāvamajja.