[2062] Disvā phalaṃ duccaritassa rāja atho suciṇṇassa mahāvipākaṃ attānameva paṭisaṃyamissaṃ na patthaye puttapasuṃ dhanaṃ vā. Dasevimā vassadasā maccānaṃ idha jīvitaṃ Appattaññeva taṃ odhiṃ naḷo chinnova sussati. Tattha kā nandi kā khiḍḍā kā rati kā dhanesanā kiṃ me puttehi dārehi rāja muttosmi bandhanā. Sohaṃ evaṃ pajānāmi maccu me nappamajjati antakenādhipannassa kā rati kā dhanesanā. Jāti narānaṃ adhamā janinda caṇḍālayoni dvipadakaniṭṭhā sakehi kammehi supāpakehi caṇḍāligabbhe avasimha pubbe. Caṇḍālāhumhāvantīsu migā nerañjaraṃ pati ukkusā rammadātīre tayajja brāhmaṇakhattiyā.

[2063] Upaniyyati jīvitamappamāyuṃ jarūpanītassa na santi tāṇā karohi pañcāla mameva vākyaṃ mākāsi kammāni dukkhudrayāni. Upaniyyati jīvitamappamāyuṃ jarūpanītassa na santi tāṇā karohi pañcāla mameva vākyaṃ mākāsi kammāni dukkhapphalāni. Upaniyyati jīvitamappamāyuṃ Jarūpanītassa na santi tāṇā karohi pañcāla mameva vākyaṃ mākāsi kammāni rajassirāni. Upaniyyati jīvitamappamāyuṃ vaṇṇaṃ jarā hanti narassa jiyyato karohi pañcāla mameva vākyaṃ mākāsi kammaṃ nirayūpapattiyā.

[2064] Addhā hi saccaṃ vacanaṃ tavedaṃ yathā isī bhāsasi evametaṃ kāmā ca me santi anapparūpā te duccajā mādisakena bhikkhu. Nāgo yathā paṅkamajjhe byasanno sayaṃ thalaṃ nābhisambhoti gantuṃ evamahaṃ kāmapaṅke byasanno na bhikkhuno maggamanubbajāmi. Yathāpi mātā ca pitā ca puttaṃ anusāsare kinti sukhī bhaveyya evaṃpi maṃ tvaṃ anusāsa bhante yathā ciraṃ pecca sukhī bhaveyyaṃ.

[2065] No ce tuvaṃ ussahase janinda kāme ime mānusake pahātuṃ dhammiṃ baliṃ paṭṭhapayassu rāja adhammakāro ca te māhu raṭṭhe. Dūtā vidhāvantu disā catasso nimantakā samaṇabrāhmaṇānaṃ te annapānena upaṭṭhahassu vatthena senāsanapaccayena ca. Annena pānena pasannacitto santappaya samaṇabrāhmaṇe ca datvā ca bhutvā ca yathānubhāvaṃ anindito saggamupehi ṭhānaṃ. Sace ca taṃ rāja mado saheyya nārīgaṇehi parivārayantaṃ imameva gāthaṃ manasikarohi bhāsehi cetaṃ parisāya majjhe. Abbhokāsasayo jantu vajantyā khīrapāyito parikiṇṇo suvānehi svājja rājāti vuccatīti. Cittasambhūtajātakaṃ dutiyaṃ.