[2084] Paññāyupetaṃ siriyā vihīnaṃ yasassinaṃ vāpi apetapaññaṃ pucchāmi senaka etamatthaṃ kamettha seyyo kusalā vadanti.

[2085] Dhīrā ca bālā ca have janinda sippūpapannā ca asippino ca sujātimantopi ajātimassa yasassino pesakarā bhavanti etampi disvāna ahaṃ vadāmi pañño nihīno sirimāva seyyo.

[2086] Tuvampi pucchāmi anomapañña mahosadha kevaladhammadassi bālaṃ yasassiṃ paṇḍitaṃ appabhogaṃ Kamettha seyyo kusalā vadanti.

[2087] Pāpāni kammāni karonti bālā idameva seyyo iti maññamānā idhalokadassī paralokaṃ adassī ubhayattha bālo kalimaggahesi etampi disvāna ahaṃ vadāmi paññova seyyo na yasassi bālo.