[2088] Na sippametaṃ vidadhāti bhogaṃ na bandhavā na sarīrāvakāso passeḷamūgaṃ sukhamedhamānaṃ sirīhīnaṃ bhajate goravindaṃ etampi disvāna ahaṃ vadāmi pañño nihīno sirimāva seyyo.

[2089] Laddhā sukhaṃ majjati appapañño dukkhena phuṭṭhopi pamohameti āgantunā sukhadukkhena phuṭṭho pavedhati vāricarova ghamme etampi disvāna ahaṃ vadāmi paññova seyyo na yasassi bālo.

[2090] Dumaṃ yathā sāduphalaṃ araññe Samantato samabhisaranti pakkhī evampi addhaṃ sadhanaṃ sabhogaṃ bahujjano bhajjati atthahetu etampi disvāna ahaṃ vadāmi pañño nihīno sirimāva seyyo.

[2091] Na sādhu balavā bālo sāhasaṃ vindate dhanaṃ kandantametaṃ dummedhaṃ kaḍḍhanti nirayaṃ bhusaṃ etampi disvāna ahaṃ vadāmi paññova seyyo na yasassi bālo.