[2092] Yākāci najjo gaṅgamabhisavanti sabbāva tā nāmagottaṃ jahanti gaṅgā samuddaṃ paṭipajjamānā na khāyate iddhiparo hi loke etampi disvāna ahaṃ vadāmi pañño nihīno sirimāva seyyo.

[2093] Yametamakkhā udadhiṃ mahantaṃ payanti najjo sabbakālaṃ asaṅkhyaṃ so sāgaro niccamuḷāravego velaṃ na acceti mahāsamuddo Evampi bālassa pajappitāni paññaṃ na acceti sirī kadāci etampi disvāna ahaṃ vadāmi paññova seyyo na yasassi bālo.

[2094] Asaññato cepi paresamatthaṃ bhaṇāti saṇṭhānagato yasassī tasseva taṃ rūhati ñātimajjhe sirīhīnaṃ kārayate na paññaṃ etampi disvāna ahaṃ vadāmi pañño nihīno sirimāva seyyo.

[2095] Parassa vā attano vāpi hetu bālo musā bhāsati appapañño so nindito hoti sabhāya majjhe pacchāpi so duggatigāmi hoti etampi disvāna ahaṃ vadāmi paññova seyyo na yasassi bālo.