[2100] Pañca paṇḍitā mayaṃ bhadante Sabbe pañjalikā upaṭṭhitā taṃ tvaṃ no abhibhuyya issarosi sakkova bhūtappati devarājā etampi disvāna ahaṃ vadāmi pañño nihīno sirimāva seyyo.

[2101] Dāsova paññassa yasassi bālo atthesu jātesu tathāvidhesu yaṃ paṇḍito nipuṇaṃ saṃvidheti sammohamāpajjati tattha bālo etampi disvāna ahaṃ vadāmi paññova seyyo na yasassi bālo.

[2102] Addhā hi paññāva sataṃ pasatthā kantā sirī bhogaratā manussā ñāṇañca buddhānamatulyarūpaṃ paññaṃ na acceti sirī kadāci.

[2103] Yantaṃ apucchimha akittayī no mahosadha kevaladhammadassi gavaṃsahassaṃ usabhañca nāgaṃ ājaññayutte ca rathe dasa ime pañhassa veyyākaraṇena tuṭṭho Dadāmi te gāmavarāni soḷasāti. Sirimandajātakaṃ catutthaṃ.