[2150] Bhātarosma mahārāja sodariyā ekamātukā ekarukkhasmi saṃvaḍḍhā nānākhettagatā ubho. Sattigumbo ca corānaṃ ahañca isinaṃ idha Asataṃ so sataṃ ahaṃ tena dhammena no vinā.

[2151] Yattha vadho ca bandho ca nikati vañcanāni ca ālopā sahasākārā tāni so tattha sikkhati. Idha saccañca dhammo ca ahiṃsā saṃyamo damo āsanūdakadāyīnaṃ aṅke vaḍḍhosmi bhārata.

[2152] Yaṃ yaṃ hi rāja bhajati santaṃ vā yadi vā asaṃ sīlavantaṃ visīlaṃ vā vasaṃ tasseva gacchati. Yādisaṃ kurute mittaṃ yādisañcūpasevata sopi tādisako hoti sahavāsopi tādiso. Sevamāno sevamānaṃ samphuṭṭho samphusaṃ paraṃ saro duṭṭho kalāpaṃva alittamupalimpati. Upalimpabhayā dhīro neva pāpasakhā siyā pūtimacchaṃ kusaggena yo naro upanayhati kusāpi pūti vāyanti evaṃ bālūpasevanā. Tagaraṃva palāsena yo naro upanayhati pattāpi surabhī vāyanti evaṃ dhīrūpasevanā tasmā palāsapuṭasseva ñatvā sampākamattano asante nūpaseveyya sante seveyya paṇḍito asanto nirayaṃ nenti santo pāpenti suggatinti. Sattigumbajātakaṃ sattamaṃ.