[2157] Yamekarattaṃ anutappathetaṃ dhanaṃva naṭṭhaṃ pitarañca petaṃ pucchāmi vo mānusadehavaṇṇe kathaṃ vināvāsamakappayittha.

[2158] Yamimaṃ nadiṃ passasi sīghasotaṃ nānādumacchādana selakūlaṃ taṃ me piyo uttari vassakāle Mamañca maññe anubandhatīti. Ahañca aṅkolakamocināmi adhimuttakaṃ sattaliyodhikañca piyo ca me hehiti mālabhārī ahañca naṃ mālini ajjhupessaṃ. Ahañcidaṃ kuravakaṃ ocināmi uddālakā pātali sindhuvāritā piyo ca me hehiti mālabhārī ahañca naṃ mālini ajjhupessaṃ. Ahañca sālassa supupphitassa oceyya pupphāni karomi mālaṃ piyo ca me hehiti mālabhārī ahañca naṃ mālini ajjhupessaṃ. Ahañca sālassa supupphitassa oceyya pupphāni karomi bhāraṃ idañca no hehiti santharatthaṃ yatthajjimaṃ viharissāma rattiṃ. Ahañca kho aggalu candanañca silāya piṃsāmi pamattarūpā piyo ca me hehiti rositaṅgo Ahañca naṃ rositā ajjhupessaṃ athāgamā salilaṃ sīghasotaṃ nudaṃ sāle salale kaṇṇikāre āpūrathe tena muhuttakena sāyaṃ nadī āsi mayā suduttarā. Ubhosu tīresu mayaṃ tadā ṭhitā sampassantā ubhayo aññamaññaṃ sakiṃpi rodāma sakiṃ hasāma kicchena no agamā sambarī sā. Pāto ca kho uggate suriyamhi catukkaṃ nadiṃ uttariyāna ludda āliṅgiyā aññamaññaṃ mayaṃ ubho sakiṃpi rodāma sakiṃ hasāma. Tīhūnakaṃ satta satāni ludda yamidha mayaṃ vippavasimha pubbe vassekimaṃ jīvitaṃ bhūmipāla konīdha kantāya vinā vaseyya.

[2159] Āyuñca vo kīvatako nu samma sacepi jānātha vadetha āyuṃ anussavā vuḍḍhato āgamā vā Akkhātha me taṃ avikampamānā.

[2160] Āyuñca no vassasahassa ludda na cantarā pāpako atthi rogo appaṃva dukkhaṃ sukhameva bhiyyo avītarāgā vijahāma jīvitaṃ.