[2172] Bhuñjassu bhoge vipule kumāra sabbañca te issariyaṃ dadāmi ajjeva tvaṃ kurūnaṃ hohi rājā mā pabbaji pabbajjā hi dukkhā.

[2173] Kinnūdha deva tavamatthi bhogā pubbevahaṃ devaloke ramissaṃ rūpehi saddehi atho rasehi gandhehi phassehi manoramehi. Bhuttā ca me bhogā tidivasmiṃ deva parivārito accharāsaṃ gaṇena tuvañca bālaṃ paraneyyaṃ viditvā Na tādise rājakule vaseyyaṃ.

[2174] Sacāhaṃ bālo paraneyyo asmi ekāparādhaṃ khama putta mayhaṃ punapi ce edisakaṃ bhaveyya yathāmatiṃ somanassa karohi.

[2175] Anisamma kataṃ kammaṃ anavatthāya cintitaṃ bhesajjasseva vebhaṅgo vipāko hoti pāpako. Nisamma ca kataṃ kammaṃ sammāvatthāya cintitaṃ bhesajjasseva sampatti vipāko hoti bhadrako. Alaso gihī kāmabhogī na sādhu asaññato pabbajito na sādhu rājā na sādhu anisammakārī yo paṇḍito kodhano taṃ na sādhu. Nisamma khattiyo kayirā nānisamma disampati nisammakārino rāja yaso kitti ca vaḍḍhati. Nisamma daṇḍaṃ paṇayeyya issaro vegā kataṃ tappati bhūmipāla sammāpaṇidhī ca narassa atthā anānutappā te bhavanti pacchā. Anānutappāni hi ye karonti Vibhajja kammāyatanāni loke viññūpasatthāni sukhudrayāni bhavanti buddhānumatāni tāni. Āgacchuṃ dovārikā khaggabandhā kāsāviyā hantuṃ mamaṃ janinda mātu ca aṅkasmimahaṃ nisinno ākaḍḍhito sahasā tehi deva. Kaṭukaṃ hi sambādhaṃ sukicchaṃ patto madhuraṃ piyaṃ jīvitaṃ laddhaṃ rāja kicchenāhaṃ ajja vadhāya mutto pabbajjamevābhimanohamasmi.