[2196] Saccappaṭiññā tavamesa hotu akkodhano hohi anūpanāhī sabbañca te nāgakulaṃ supaṇṇā aggiṃva gimhāsu vivajjayantu.

[2197] Anukampasi nāgakulaṃ janinda mātā yathā suppiyamekaputtaṃ ahañca te nāgakulena saddhiṃ kāhāmi veyyāvaṭikaṃ uḷāraṃ.

[2198] Yojentu ve rājarathe sucitte kambojake assatare sudante nāge ca yojentu suvaṇṇakappane dakkhemu nāgassa nivesanāni.

[2199] Bherī mudiṅgā paṇavā ca saṅkhā āvajjayiṃsu uggasenarañño pāyāsi rājā bahu sobhamāno purakkhato nārigaṇassa majjhe.