[2277] Sīhā ca byagghā ca athopi dīpiyo pasayha khādanti viphandamānaṃ na maccuno khāditumussahanti tamme matī hoti carāmi dhammaṃ.

[2278] Māyākārā raṅgamajjhe karontā mohenti cakkhūni janassa tāvade na maccuno mohayitumussahanti tamme matī hoti carāmi dhammaṃ.

[2279] Āsīvisā kuppitā uggatejā ḍaṃsanti mārentipi te manusse na maccuno ḍaṃsitumussahanti tamme matī hoti carāmi dhammaṃ.

[2280] Āsīvisā kuppitā yaṃ ḍaṃsanti tikicchakā tesa visaṃ hananti na maccuno daṭṭhavisaṃ hananti tamme matī hoti carāmi dhammaṃ.