[2324] Cando yathā rāhumukhā pamutto virocate paṇṇaraseva bhāṇumā evaṃ tuvaṃ porisādā pamutto viroca kapille mahānubhāva āmodayaṃ pitaraṃ mātarañca sabbo ca te nandatu ñātipakkho.

[2325] Tato have dhītimā rājaputto katañjalī paggayha porisādaṃ anuññāto sotthi sukhī arogo paccāgamā kapillamalīnasatto.

[2326] Taṃ negamā jānapadā ca sabbe hatthārohā rathikā pattikā ca namassamānā pañjalikā upāgamuṃ namatthu te dukkarakārakosīti. Jayaddisajātakaṃ tatiyaṃ.