[2339] Tattheva sā pokkharaṇī avidūre rammā sutitthā ca mahodakā ca Saṃpupphitā bhamaragaṇānuciṇṇā ettha hi so nhāyati nāgarājā. Sīsaṃ nahāto uppalamāladhārī sabbaseto puṇḍarikatacaṅgī āmodamāno gacchati sanniketaṃ purakkhatvā mahesiṃ sabbabhaddaṃ.

[2340] Tattheva so uggahetvāna vākyaṃ ādāya tūṇiñca dhanuñca luddo vituriyati satta gīrī brahante suvaṇṇapassannāma giriṃ uḷāraṃ. Āruyha selaṃ bhavanaṃ kinnarānaṃ olokayi pabbatapādamūlaṃ tatthaddasā meghasamānavaṇṇaṃ nigrodharājaṃ aṭṭhasahassapādaṃ. Tatthaddasā kuñjaraṃ chabbisāṇaṃ sabbasetaṃ duppasahaṃ parebhi rakkhanti naṃ aṭṭhasahassanāgā īsādantā vātajavappahārino. Tatthaddasā pokkharaṇiṃ avidūre rammaṃ sutitthañca mahodakañca Saṃpupphitaṃ bhamaragaṇānuciṇṇaṃ yattha hi so nhāyati nāgarājā. Disvāna nāgassa gatiṃ ṭhitañca vīthissa yā nhānagatassa hoti opātamāgacchi anariyarūpo payojito cittavasānugāya.

[2341] Khaṇitvāna kāsuṃ phalakehi chādayi attānamodhāya dhanuñca luddo passāgataṃ puthusallena nāgaṃ samappayi dukkaṭakammakārī. Viddho ca nāgo koñcamanādi ghoraṃ sabbeva nāgā ninnādu ghorarūpaṃ tiṇañca kaṭṭhañca raṇaṃ karontā dhāviṃsu te aṭṭha disā samantato. Vadhissamenanti parāmasanto kāsāvamaddakkhi dhajaṃ isīnaṃ dukkhena phuṭṭhassudapādi saññā arahaddhajo sabbhi avajjharūpo.

[2342] Anikkasāvo kāsāvaṃ yo vatthaṃ paridahissati apeto damasaccena na so kāsāvamarahati. Yo ca vantakasāvassa sīlesu susamāhito upeto damasaccena save kāsāvamarahati.