[2347] Bhayaṭṭitā nāgavadhena aṭṭā ye te nāgā aṭṭha disā vidhāvuṃ adisvāna posaṃ gajapaccamittaṃ paccāgamuṃ yena so nāgarājā.

[2348] Te tattha kanditvā roditvāna nāgā sīse sake paṃsukaṃ okiritvā āgamiṃsu te sabbe sakaṃ niketaṃ purakkhatvā mahesiṃ sabbabhaddaṃ.

[2349] Ādāya dantāni gajuttamassa vaggū subhe appaṭime paṭhabyā suvaṇṇarājīhi samantamodare so luddako kāsipuraṃ upāgami upanesi so rājakaññāya dante nāgo hato handa imassa dantā.

[2350] Disvāna dantāni gajuttamassa bhattu piyassa purimāya jātiyā tattheva tassā hadayaṃ aphāli Teneva sā kālamakāsi bālā.