[2511] Aḷāra nāññatra manussalokā saddhī va saṃvijjati saṃyamo vā ahañca laddhāna manussayoniṃ kāhāmi jātimaraṇassa antaṃ.

[2512] Saṃvaccharo me vasato tavantike annena pānena upaṭṭhitosmi āmantayitvāna palemi nāga cirappavuṭṭhosmi ahaṃ janinda.

[2513] Puttā ca dārā anujīvino ca niccānusiṭṭhā upatiṭṭhate taṃ kaccinu te nābhisaṃsittha koci piyañhi me dassanaṃ tuyha aḷāra.

[2514] Yathāpi mātu ca pitu agāre putto piyo paṭivihito vaseyya tatopi mayhaṃ idhameva seyyo cittañhi te nāga mayi pasannaṃ.