[66] |66.1| Kassa sutvā sataṃ dammi sahassaṃ diṭṭhasoṇakaṃ ko me soṇakamakkhāti sahāyaṃ paṃsukīḷitaṃ. |66.2| Atha bravi māṇavako daharo pañcacūḷako mayhaṃ sutvā sataṃ dehi sahassaṃ diṭṭhasoṇakaṃ ahaṃ te soṇakamakkhissaṃ sahāyaṃ paṃsukīḷitaṃ.

[67] Katarasmiṃ so janapade raṭṭhesu nigamesu ca kattha soṇakamaddakkhi taṃ me akkhāhi pucchito.

[68] |68.1| Taveva deva vijite tavevuyyānabhūmiyā ujuvaṃsā mahāsālā nīlobhāsā manoramā. |68.2| Tiṭṭhanti meghasamānā rammā aññoññanissitā tesaṃ mūlasmi soṇako jhāyati anupādino upādānesu lokesu ḍayhamānesu nibbuto.

[69] |69.1| Tato ca rājā pāyāsi senāya caturaṅgiyā kārāpetvā samaṃ maggaṃ agamā yena soṇako. |69.2| Uyyānabhūmiṃ gantvāna vicaranto brahāvane Āsīnaṃ soṇakaṃ dakkhi ḍayhamānesu nibbutaṃ.