[257] Pāṇissarā mudiṅgā ca murajālambarāni ca suttamenaṃ pabodhenti paṭibuddho ca nandati.

[258] |258.1| Yekecime maccharino kadariyā paribhāsakā samaṇabrāhmaṇānaṃ idheva nikkhippa sarīradehaṃ Kāyassa bhedā nirayaṃ vajanti. |258.2| Yekecime sugatimāsasānā dhamme ṭhitā saṃyame saṃvibhāge idheva nikkhippa sarīradehaṃ kāyassa bhedā sugatiṃ vajanti.

[259] Tvaṃ no ñāti purimāsu jātisu so maccharī kosiyo pāpadhammo taveva atthāya idhāgatamhā mā pāpadhammo nirayaṃ apattha .

[260] |260.1| Addhā hi me te hitakāmā yaṃ maṃ samanusāsatha sohaṃ tathā karissāmi sabbaṃ vuttaṃ hitesibhi. |260.2| Esohamajjeva upāramāmi na cāpihaṃ kiñci kareyya pāpaṃ na cāpi me kiñci adeyyamatthi na cāpidatvā udakaṃ pivāmi . |260.3| Evañca me dadato sabbakālaṃ bhogāpi me vāsava khīyissanti tato ahaṃ pabbajissāmi sakka hitvā kāmāni yathodhikāni.