[355] Mutto tuvaṃ porisādassa hatthā gantvā sakaṃ mandiraṃ kāmakāmī Amittahatthaṃ punarāgatosi na khatyadhamme kusalosi rāja.

[356] Ye khatyadhamme kusalā bhavanti pāyena te nerayikā bhavanti tasmā ahaṃ khatyadhammaṃ pahāya saccānurakkhī punarāgatosmi yajassu yaññaṃ khāda maṃ porisāda.

[357] Pāsādavāsā paṭhavīgavassā kāmitthiyo kāsikacandanañca sabbaṃ tahiṃ labhasi sāmitāya saccena kiṃ passati ānisaṃsaṃ.

[358] Yekecime atthi rasā paṭhabyā saccaṃ tesaṃ sādhutaraṃ rasānaṃ sacce ṭhitā samaṇabrāhmaṇā ca taranti jātimaraṇassa pāraṃ.