[321] Disvāna taṇhaṃ aratiñca rāgaṃ nāhosi chando api methunasmiṃ kimevidaṃ muttakarīsapuṇṇaṃ pādāpi naṃ samphusituṃ na icche.

[322] Disvāna taṇhaṃ aratiñca rāgaṃ nāhosi chando api methunasminti taṇhañca aratiñca rāgañca māradhītaro disvā passitvā methunadhamme chando vā rāgo vā pemaṃ vā nāhosīti disvāna taṇhaṃ aratiñca rāgaṃ nāhosi chando api methunasmiṃ.

[323] Kimevidaṃ muttakarīsapuṇṇaṃ pādāpi naṃ samphusituṃ na iccheti kimevidaṃ sarīraṃ muttapuṇṇaṃ karīsapuṇṇaṃ semhapuṇṇaṃ rudhirapuṇṇaṃ aṭṭhisaṅghāṭaṃ nhārusambandhaṃ rudhiramaṃsāvalepanaṃ cammāvinaddhaṃ chaviyā paṭicchannaṃ chiddāvachiddaṃ ugghariṃ pagghariṃ kimisaṅghanisevitaṃ nānākalimalaparipūraṃ pādena akkamituṃ na iccheyyaṃ kuto pana saṃvāso vā samāgamo vāti kimevidaṃ muttakarīsapuṇṇaṃ pādāpi naṃ samphusituṃ na icche. [5]- Tenāha bhagavā disvāna taṇhaṃ aratiñca rāgaṃ nāhosi chando api methunasmiṃ Kimevidaṃ muttakarīsapuṇṇaṃ pādāpi naṃ samphusituṃ na iccheti.

[324] Etādisañce ratanaṃ na icchasi nāriṃ narindehi bahūhi patthitaṃ diṭṭhigataṃ sīlavatānujīvitaṃ bhavūpapattiñca vadesi kīdisaṃ.