[287] Upaccagā manti anutthunātīti so maṃ vādena vādaṃ accagā upaccagā atikkanto samatikkanto vītivattoti evampi upaccagā manti . athavā maṃ vādena vādaṃ abhibhavitvā ajjhottharitvā pariyādayitvā madditvā carati viharati iriyati vattati pāleti yapeti yāpetīti evampi upaccagā manti . anutthunā vuccati vācāpalāpo vippalāpo lālappo lālappāyanā lālappāyitattanti upaccagā manti anutthunāti. Tenāha bhagavā yamassa vādaṃ parihīnamāhu apāhataṃ pañhavimaṃsakā ye paridevatī socati hīnavādo upaccagā manti anutthunātīti.

[288] Ete vivādā samaṇesu jātā etesu ugghātinighāti hoti Etampi disvā virame kathojjaṃ na haññadatthatthi pasaṃsalābhā.

[289] Ete vivādā samaṇesu jātāti samaṇāti yekeci ito bahiddhā paribbājupagatā paribbājakasamāpannā ete diṭṭhikalahā diṭṭhibhaṇḍanā diṭṭhiviggahā diṭṭhivivādā diṭṭhimedhagā samaṇesu jātā sañjātā nibbattā abhinibbattā pātubhūtāti ete vivādā samaṇesu jātā.

[290] Etesu ugghātinighāti hotīti jayaparājayo hoti lābhālābho hoti yasāyaso hoti nindāpasaṃsā hoti sukhadukkhaṃ hoti somanassadomanassaṃ hoti iṭṭhāniṭṭhaṃ hoti anunayapaṭighaṃ hoti ugghātinighāti hoti anurodhavirodho hoti jayena cittaṃ ugghātitaṃ hoti parājayena cittaṃ nigghātitaṃ hoti lābhena cittaṃ ugghātitaṃ hoti alābhena cittaṃ nigghātitaṃ hoti yasena cittaṃ ugghātitaṃ hoti ayasena cittaṃ nigghātitaṃ hoti pasaṃsāya cittaṃ ugghātitaṃ hoti nindāya cittaṃ nigghātitaṃ hoti sukhena cittaṃ ugghātitaṃ hoti dukkhena cittaṃ nigghātitaṃ hoti somanassena cittaṃ ugghātitaṃ hoti domanassena cittaṃ nigghātitaṃ hoti uṇṇatiyā cittaṃ ugghātitaṃ hoti oṇatiyā cittaṃ nigghātitaṃ hotīti etesu ugghātinighāti hoti.