[295] Akkhāya vādaṃ parisāya majjheti khattiyaparisāya vā brāhmaṇaparisāya vā gahapatiparisāya vā samaṇaparisāya vā majjhe attano vādaṃ akkhāya ācikkhitvā anuvādaṃ akkhāya ācikkhitvā thambhayitvā brūhayitvā dīpayitvā jotayitvā voharitvā pariggaṇhitvāti akkhāya vādaṃ parisāya majjhe.

[296] So hassati uṇṇamaticca tenāti so tena jayatthena tuṭṭho hoti haṭṭho pahaṭṭho attamano paripuṇṇasaṅkappo . Athavā dantavidaṃsakaṃ hasamānoti so hassati . uṇṇamaticca tenāti so tena jayatthena uṇṇato hoti uṇṇamo dhajo sampaggāho ketukamyatā cittassāti so hassati uṇṇamaticca tena.

[297] Pappuyya tamatthaṃ yathāmano ahūti taṃ jayatthaṃ pappuyya pāpuṇitvā adhigantvā vinditvā paṭilabhitvā . yathāmano ahūti yathāmano ahu yathācitto ahu yathāsaṅkappo ahu yathāviññāṇo ahūti pappuyya tamatthaṃ yathāmano ahu. Tenāha bhagavā pasaṃsito vā pana tattha hoti akkhāya vādaṃ parisāya majjhe so hassati uṇṇamaticca tena pappuyya tamatthaṃ yathāmano ahūti.

[298] Yā uṇṇatī sāssa vighātabhūmi mānātimānaṃ vadate paneso etampi disvā na vivādayetha na hi tena suddhiṃ kusalā vadanti.