[314] Diṭṭhīhi diṭṭhiṃ avirujjhamānāti tesaṃ dvāsaṭṭhī diṭṭhigatāni Pahīnāni samucchinnāni vūpasantāni paṭippassaddhāni abhabbuppattikāni ñāṇagginā daḍḍhāni te diṭṭhīhi diṭṭhiṃ avirujjhamānā aghaṭṭiyamānā appaṭihaññamānā appaṭihatamānāti diṭṭhīhi diṭṭhiṃ avirujjhamānā.

[315] Tesu tvaṃ kiṃ labhetho pasūrāti tesu arahantesu khīṇāsavesu kiṃ labhetho paṭisūra paṭipurisa paṭisattu paṭimallāti tesu tvaṃ kiṃ labhetho pasūra.

[316] Yesīdha natthī paramuggahītanti yesaṃ arahantānaṃ khīṇāsavānaṃ idaṃ paramaṃ aggaṃ seṭṭhaṃ viseṭṭhaṃ pāmokkhaṃ uttamaṃ pavaranti gahitaṃ parāmaṭṭhaṃ ajjhositaṃ adhimuttaṃ natthi na saṃvijjati nupalabbhati pahīnaṃ samucchinnaṃ vūpasantaṃ paṭippassaddhaṃ abhabbuppattikaṃ ñāṇagginā daḍḍhanti yesīdha natthī paramuggahītaṃ. Tenāha bhagavā visenikatvā pana ye caranti diṭṭhīhi diṭṭhiṃ avirujjhamānā tesu tvaṃ kiṃ labhetho pasūra yesīdha natthī paramuggahītanti.

[317] Atha tvaṃ pavitakkamāgamā manasā diṭṭhigatāni cintayanto dhonena yugaṃ samāgamā na hi tvaṃ sakkhasi sampayātave.