[329] Ajjhattasantiṃ pacinaṃ adassanti [2]- ajjhattaṃ rāgassa santiṃ dosassa santiṃ mohassa santiṃ kodhassa upanāhassa Makkhassa paḷāsassa issāya macchariyassa māyāya sāṭheyyassa thambhassa sārambhassa mānassa atimānassa madassa pamādassa sabbakilesānaṃ sabbaduccaritānaṃ sabbadarathānaṃ sabbapariḷāhānaṃ sabbasantāpānaṃ sabbākusalābhisaṅkhārānaṃ santiṃ [1]- vūpasantiṃ nibbutiṃ paṭippassaddhiṃ [2]- . pacinanti pacinanto vicinanto pavicinanto tulayanto tīrayanto vibhāvayanto vibhūtaṃ karonto sabbe saṅkhārā aniccāti pacinanto vicinanto pavicinanto tulayanto tīrayanto vibhāvayanto vibhūtaṃ karonto sabbe saṅkhārā dukkhāti sabbe dhammā anattāti .pe. Yaṅkiñci samudayadhammaṃ sabbantaṃ nirodhadhammanti pacinanto vicinanto pavicinanto tulayanto tīrayanto vibhāvayanto vibhūtaṃ karonto . Adassanti adassaṃ adakkhiṃ passiṃ paṭivijjhinti ajjhattasantiṃ pacinaṃ adassaṃ. Tenāha bhagavā idaṃ vadāmīti na tassa hoti (māgandiyāti bhagavā) dhammesu niccheyya samuggahītaṃ passañca diṭṭhīsu anuggahāya ajjhattasantiṃ pacinaṃ adassanti.

[330] Vinicchayā yāni pakappitāni (iti māgandiyo) te ve munī brūsi anuggahāya ajjhattasantīti yametamatthaṃ kathaṃ nu dhīrehi paveditantaṃ.

[331] Vinicchayā yāni pakappitānīti vinicchayāni vuccanti dvāsaṭṭhī diṭṭhigatāni [1]- . pakappitānīti kappitā abhisaṅkhatā saṇṭhapitātipi pakappitā . athavā aniccā saṅkhatā paṭiccasamuppannā khayadhammā vayadhammā virāgadhammā nirodhadhammā vipariṇāmadhammātipi pakappitāti vinicchayā yāni pakappitāni . iti māgandiyoti itīti padasandhi .pe. padānupubbatāmetaṃ itīti . māgandiyoti tassa brāhmaṇassa nāmaṃ saṅkhā samaññā [2]- vohāroti iti māgandiyo.

[332] Te ve munī brūsi anuggahāya ajjhattasantīti yametamatthanti te veti dvāsaṭṭhī diṭṭhigatāni . munīti monaṃ vuccati ñāṇaṃ .pe. Saṅgajālamaticca so munīti . anuggahāyāti diṭṭhīsu ādīnavaṃ passanto diṭṭhiyo na gaṇhāmi na parāmasāmi nābhinivisāmīti paggaṇhāsi ajjhattasantīti ca bhaṇasi . yametamatthanti yaṃ paramatthanti te ve munī brūsi anuggahāya ajjhattasantīti yametamatthaṃ.