[341] No ce kira diṭṭhiyā na sutiyā na ñāṇenāti diṭṭhiyāpi suddhiṃ visuddhiṃ parisuddhiṃ muttiṃ vimuttiṃ parimuttiṃ nāha na kathesi na bhaṇasi na dīpayasi na voharasi . sutenapi suddhiṃ visuddhiṃ parisuddhiṃ muttiṃ vimuttiṃ parimuttiṃ nāha na kathesi na bhaṇasi na dīpayasi na voharasi . diṭṭhasutenapi suddhiṃ visuddhiṃ Parisuddhiṃ muttiṃ vimuttiṃ parimuttiṃ nāha na kathesi na bhaṇasi na dīpayasi na voharasi . ñāṇenapi suddhiṃ visuddhiṃ parisuddhiṃ muttiṃ vimuttiṃ parimuttiṃ nāha na kathesi na bhaṇasi na dīpayasi na voharasīti no ce kira diṭṭhiyā na sutiyā na ñāṇena . iti māgandiyoti itīti padasandhi .pe. padānupubbatāmetaṃ itīti . māgandiyoti tassa brāhmaṇassa nāmanti iti māgandiyo.

[342] Sīlabbatenāpi na suddhimāhāti sīlenapi suddhiṃ visuddhiṃ parisuddhiṃ vattenapi suddhiṃ visuddhiṃ parisuddhiṃ sīlabbatenapi suddhiṃ visuddhiṃ parisuddhiṃ muttiṃ vimuttiṃ parimuttiṃ nāha na kathesi na bhaṇasi na dīpayasi na voharasīti sīlabbatenāpi na suddhimāha.

[343] Adiṭṭhiyā assutiyā añāṇā asīlatā abbatā nopi tenāti diṭṭhipi icchitabbāti evaṃ bhaṇasi savanampi icchitabbanti evaṃ bhaṇasi ñāṇampi icchitabbanti evaṃ bhaṇasi sīlampi icchitabbanti evaṃ bhaṇasi vattampi icchitabbanti evaṃ bhaṇasi na sakkosi ekaṃsena anujānituṃ na sakkosi ekaṃsena paṭikkhipitunti adiṭṭhiyā assutiyā añāṇā asīlatā abbatā nopi tena.

[344] Maññāmahaṃ momuhameva dhammanti momūhadhammo ayaṃ tuyhaṃ bāladhammo mūḷhadhammo añāṇadhammo amarāvikkhepadhammoti evaṃ maññāmi evaṃ jānāmi evaṃ ājānāmi [2]- evaṃ paṭivijjhāmīti maññāmahaṃ momuhameva dhammaṃ.