[345] Diṭṭhiyā eke paccenti suddhinti diṭṭhiyā eke samaṇabrāhmaṇā suddhiṃ visuddhiṃ parisuddhiṃ muttiṃ vimuttiṃ parimuttiṃ paccenti . sassato loko idameva saccaṃ moghamaññanti diṭṭhiyā eke samaṇabrāhmaṇā suddhiṃ visuddhiṃ parisuddhiṃ muttiṃ vimuttiṃ parimuttiṃ paccenti . asassato loko .pe. neva hoti na na hoti tathāgato parammaraṇā idameva saccaṃ moghamaññanti diṭṭhiyā eke samaṇabrāhmaṇā suddhiṃ visuddhiṃ parisuddhiṃ muttiṃ vimuttiṃ parimuttiṃ paccentīti diṭṭhiyā eke paccenti suddhiṃ. Tenāha so brāhmaṇo no ce kira diṭṭhiyā na sutiyā na ñāṇena (iti māgandiyo) sīlabbatenāpi na suddhimāha adiṭṭhiyā assutiyā añāṇā asīlatā abbatā nopi tena maññāmahaṃ momuhameva dhammaṃ diṭṭhiyā eke paccenti suddhinti.

[346] Diṭṭhīsu nissāya anupucchamāno (māgandiyāti bhagavā) samuggahītesu pamohamāgā ito ca nāddakkhi aṇumpi saññaṃ tasmā tuvaṃ momuhato dahāsi.

[347] Diṭṭhīsu nissāya anupucchamānoti māgandiyo brāhmaṇo diṭṭhiṃ nissāya diṭṭhiṃ pucchati lagganaṃ nissāya lagganaṃ pucchati Bandhanaṃ nissāya bandhanaṃ pucchati palibodhaṃ nissāya palibodhaṃ pucchati . anupucchamānoti punappunaṃ pucchatīti diṭṭhīsu nissāya anupucchamāno . māgandiyāti bhagavā taṃ brāhmaṇaṃ nāmena ālapati . bhagavāti gāravādhivacanaṃ .pe. sacchikā paññatti yadidaṃ bhagavāti māgandiyāti bhagavā.

[348] Samuggahītesu pamohamāgāti yā diṭṭhi tayā gahitā parāmaṭṭhā abhiniviṭṭhā ajjhositā adhimuttā tāyeva tvaṃ diṭṭhiyā mūḷhosi pamūḷho sammūḷho mohaṃ āgatosi pamohaṃ āgatosi sammohaṃ āgatosi andhakāraṃ pakkhantosīti samuggahītesu pamohamāgā.