[349] Ito ca nāddakkhi aṇumpi saññanti ito ajjhattasantito vā paṭipattito vā dhammadesanato vā yuttasaññaṃ vā pattasaññaṃ vā lakkhaṇasaññaṃ vā kāraṇasaññaṃ vā ṭhānasaññaṃ vā na paṭilabhasi kuto ñāṇanti evampi ito ca nāddakkhi aṇumpi saññaṃ . athavā aniccaṃ vā aniccasaññānulomaṃ vā dukkhaṃ vā dukkhasaññānulomaṃ vā anattaṃ vā anattasaññānulomaṃ vā saññuppādamattaṃ vā saññānimittaṃ vā na paṭilabhasi kuto ñāṇanti evampi ito ca nāddakkhi aṇumpi saññaṃ.

[350] Tasmā tuvaṃ momuhato dahāsīti tasmāti tasmā taṃkāraṇā taṃhetu tappaccayā taṃnidānā momūhadhammato bāladhammato Mūḷhadhammato añāṇadhammato amarāvikkhepadhammato dahāsi passasi dakkhasi olokesi nijjhāyasi upaparikkhasīti tasmā tuvaṃ momuhato dahāsi. Tenāha bhagavā diṭṭhīsu nissāya anupucchamāno (māgandiyāti bhagavā) samuggahītesu pamohamāgā ito ca nāddakkhi aṇumpi saññaṃ tasmā tuvaṃ momuhato dahāsīti.

[351] Samo visesī uda vā nihīno yo maññatī so vivadetha tena tīsu vidhāsu avikampamāno samo visesīti na tassa hoti.

[352] Samo visesī uda vā nihīno yo maññatī so vivadetha tenāti sadisohamasmīti vā seyyohamasmīti vā hīnohamasmīti vā yo maññati so tena mānena tāya diṭṭhiyā tena vā puggalena kalahaṃ kareyya bhaṇḍanaṃ kareyya viggahaṃ kareyya vivādaṃ kareyya medhagaṃ kareyya na tvaṃ imaṃ dhammavinayaṃ ājānāsi ahaṃ imaṃ dhammavinayaṃ ājānāmi kiṃ tvaṃ imaṃ dhammavinayaṃ ājānissasi micchāpaṭipanno tvamasi ahamasmi sammāpaṭipanno sahitamme asahitante pure vacanīyaṃ pacchā avaca pacchā vacanīyaṃ pure avaca adhiciṇṇante viparāvattaṃ āropito te vādo Niggahitosi cara vādappamokkhāya nibbedhehi vā sace pahosīti samo visesī uda vā nihīno yo maññatī so vivadetha tena.