[361] Yehi vivitto vicareyya loke na tāni uggayha vadeyya nāgo elambujaṃ kaṇṭakavārijaṃ yathā jalena paṅkena ca nūpalittaṃ evaṃ munī santivado agiddho kāme ca loke ca anūpalitto.

[362] Yehi vivitto vicareyya loketi yehīti [3]- diṭṭhigatehi. Vivittoti kāyaduccaritena vitto vivitto pavivitto vacīduccaritena manoduccaritena rāgena .pe. sabbākusalābhisaṅkhārehi vitto vivitto pavivitto . vicareyyāti careyya vihareyya iriyeyya vatteyya pāleyya yapeyya yāpeyya . loketi manussaloketi yehi vivitto vicareyya loke.

[363] Na tāni uggayha vadeyya nāgoti nāgoti āguṃ na karotīti nāgo. Na gacchatīti nāgo. Nāgacchatīti nāgo. {363.1} Kathaṃ āguṃ na karotīti nāgo. Āgu vuccanti pāpakā akusalā dhammā saṅkilesikā ponobbhavikā sadarā dukkhavipākā āyatiṃ jātijarāmaraṇīyā. Āguṃ na karotīti kiñci loke (sabhiyāti bhagavā) sabbasaṃyoge visajja bandhanāni sabbattha na sajjati vimutto nāgo tādi vuccate tathattāti evaṃ āguṃ na karotīti nāgo. {363.2} Kathaṃ na gacchatīti nāgo. Na chandāgatiṃ gacchati na dosāgatiṃ gacchati na mohāgatiṃ gacchati na bhayāgatiṃ gacchati na rāgavasena gacchati na dosavasena gacchati na mohavasena gacchati na mānavasena gacchati na diṭṭhivasena gacchati na uddhaccavasena gacchati na vicikicchāvasena gacchati na anusayavasena gacchati na vaggehi dhammehi yāyati niyyati vuyhati saṃhariyati evaṃ na gacchatīti nāgo. {363.3} Kathaṃ nāgacchatīti nāgo. Sotāpattimaggena ye kilesā pahīnā te kilese na puneti na pacceti na paccāgacchati sakadāgāmimaggena anāgāmimaggena arahattamaggena ye kilesā pahīnā te kilese na puneti na pacceti na paccāgacchati evaṃ nāgacchatīti nāgo. {363.4} Na tāni uggayha vadeyya nāgoti nāgo na tāni diṭṭhigatāni gahetvā uggahetvā gaṇhitvā parāmasitvā abhinivisitvā vadeyya katheyya bhaṇeyya dīpayeyya vohareyya sassato loko asassato loko .pe. neva hoti na na hoti tathāgato parammaraṇā idameva saccaṃ moghamaññanti vadeyya katheyya bhaṇeyya dīpayeyya vohareyyāti na tāni uggayha vadeyya nāgo.