[364] Elambujaṃ kaṇṭakavārijaṃ yathā jalena paṅkena ca nūpalittanti elaṃ vuccati udakaṃ . ambu vuccati udakaṃ . ambujaṃ vuccati padumaṃ . kaṇṭako vuccati kharadaṇḍo . vāri vuccati udakaṃ . vārijaṃ vuccati padumaṃ vārijaṃ vārisambhavaṃ . jalaṃ vuccati udakaṃ . paṅko vuccati kaddamo . yathā padumaṃ vārijaṃ vārisambhavaṃ jalena ca paṅkena ca na limpati na saṃlimpati nupalimpati alittaṃ asaṃlittaṃ anupalittanti elambujaṃ kaṇṭakavārijaṃ yathā jalena paṅkena ca nūpalittaṃ.
[365] Evaṃ munī santivado agiddho kāme ca loke ca anūpalittoti evanti opammasampaṭipādanā . munīti monaṃ vuccati ñāṇaṃ .pe. saṅgajālamaticca so muni . santivadoti santivādo muni tāṇavādo leṇavādo saraṇavādo abhayavādo accutavādo amatavādo nibbānavādoti evaṃ munī santivado . agiddhoti gedho vuccati taṇhā yo rāgo sārāgo .pe. abhijjhā Lobho akusalamūlaṃ . yasseso gedho pahīno samucchinno vūpasanto paṭippassaddho abhabbuppattiko ñāṇagginā daḍḍho so vuccati agiddho . so rūpe agiddho sadde gandhe rase phoṭṭhabbe kule gaṇe āvāse lābhe yase pasaṃsāya sukhe cīvare piṇḍapāte senāsane gilānapaccayabhesajjaparikkhāre kāmadhātuyā rūpadhātuyā arūpadhātuyā kāmabhave rūpabhave arūpabhave saññābhave asaññābhave nevasaññānāsaññābhave ekavokārabhave catuvokārabhave pañcavokārabhave atīte anāgate paccuppanne diṭṭhasutamuta- viññātabbesu dhammesu agiddho agadhito amucchito anajjhopanno vītagedho cattagedho vantagedho muttagedho pahīnagedho paṭinissaṭṭhagedho vītarāgo cattarāgo vantarāgo muttarāgo pahīnarāgo paṭinissaṭṭharāgo nicchāto nibbuto sītibhūto sukhapaṭisaṃvedī brahmabhūtena attanā viharatīti evaṃ munī santivado agiddho. {365.1} Kāme ca loke ca anūpalittoti kāmāti uddānato dve kāmā vatthukāmā ca kilesakāmā ca .pe. ime vuccanti vatthukāmā .pe. ime vuccanti kilesakāmā . loketi apāyaloke manussaloke devaloke khandhaloke dhātuloke āyatanaloke . lepoti dve lepā taṇhālepo ca diṭṭhilepo ca .pe. ayaṃ taṇhālepo .pe. ayaṃ diṭṭhilepo . muni taṇhālepaṃ pahāya diṭṭhilepaṃ paṭinissajjitvā kāme ca loke ca na limpati na saṃlimpati nupalimpati alitto Asaṃlitto anupalitto nikkhanto nissaṭṭho vippamutto visaññutto vimariyādikatena cetasā viharatīti evaṃ munī santivado agiddho kāme ca loke ca anūpalitto. Tenāha bhagavā yehi vivitto vicareyya loke na tāni uggayha vadeyya nāgo elambujaṃ kaṇṭakavārijaṃ yathā jalena paṅkena ca nūpalittaṃ evaṃ munī santivado agiddho kāme ca loke ca anūpalittoti.