[380] Pubbamantamanissitoti pubbanto vuccati atīto addhā Atītaṃ addhānaṃ ārabbha taṇhā pahīnā hoti diṭṭhi paṭinissaṭṭhā taṇhāya pahīnattā diṭṭhiyā paṭinissaṭṭhattā evampi pubbamantamanissito . athavā evaṃrūpo ahosiṃ atītamaddhānanti tattha nandiṃ na samanvāgameti evaṃvedano ahosiṃ evaṃsañño ahosiṃ evaṃsaṅkhāro ahosiṃ evaṃviññāṇo ahosiṃ atītamaddhānanti tattha nandiṃ na samanvāgameti evampi pubbamantamanissito . athavā iti me cakkhu ahosi atītamaddhānaṃ iti rūpāti tattha na chandarāgapaṭibaddhaṃ hoti viññāṇaṃ na chandarāgapaṭibaddhattā viññāṇassa na tadabhinandati na tadabhinandanto evampi pubbamantamanissito. {380.1} Iti me sotaṃ ahosi atītamaddhānaṃ iti saddāti iti me ghānaṃ ahosi atītamaddhānaṃ iti gandhāti iti me jivhā ahosi atītamaddhānaṃ iti rasāti iti me kāyo ahosi atītamaddhānaṃ iti phoṭṭhabbāti iti me mano ahosi atītamaddhānaṃ iti dhammāti tattha na chandarāgapaṭibaddhaṃ hoti viññāṇaṃ na chandarāgapaṭibaddhattā viññāṇassa na tadabhinandati na tadabhinandanto evampi pubbamantamanissito . athavā yānassu tāni pubbe mātugāmena saddhiṃ hasita lapita kathita kīḷitāni na tadassādeti na taṃ nikāmeti na ca tena pavittiṃ āpajjati evampi pubbamantamanissito.

[381] Vemajjhe nupasaṅkheyyoti vemajjhe vuccati paccuppanno addhā . paccuppannaṃ addhānaṃ ārabbha taṇhā pahīnā hoti diṭṭhi Paṭinissaṭṭhā taṇhāya pahīnattā diṭṭhiyā paṭinissaṭṭhattā rattoti nupasaṅkheyyo duṭṭhoti nupasaṅkheyyo mūḷhoti nupasaṅkheyyo vinibandhoti nupasaṅkheyyo parāmaṭṭhoti nupasaṅkheyyo vikkhepagatoti nupasaṅkheyyo aniṭṭhaṅgatoti nupasaṅkheyyo thāmagatoti nupasaṅkheyyo . te abhisaṅkhārā pahīnā abhisaṅkhārānaṃ pahīnattā gatiyā nupasaṅkheyyo nerayikoti vā tiracchānayonikoti vā pittivisayikoti vā manussoti vā devoti vā rūpīti vā arūpīti vā saññīti vā asaññīti vā nevasaññīnāsaññīti vā . so hetu natthi paccayo natthi kāraṇaṃ natthi yena saṅkhaṃ gaccheyyāti vemajjhe nupasaṅkheyyo.