[382] Tassa natthi purekkhatanti tassāti arahato khīṇāsavassa . purekkhāroti dve purekkhārā taṇhāpurekkhāro ca diṭṭhipurekkhāro ca .pe. ayaṃ taṇhāpurekkhāro .pe. ayaṃ diṭṭhipurekkhāro . tassa taṇhāpurekkhāro pahīno diṭṭhipurekkhāro paṭinissaṭṭho taṇhāpurekkhārassa pahīnattā diṭṭhipurekkhārassa paṭinissaṭṭhattā na taṇhaṃ vā diṭṭhiṃ vā purato katvā carati na taṇhādhajo na taṇhāketu na taṇhādhipateyyo na diṭṭhiddhajo na diṭṭhiketu na diṭṭhādhipateyyo na taṇhāya vā diṭṭhiyā vā parivārito caratīti evampi tassa natthi purekkhataṃ . athavā evaṃrūpo siyaṃ anāgatamaddhānanti tattha nandiṃ na samanvāgameti Evaṃvedano siyaṃ evaṃsañño siyaṃ evaṃsaṅkhāro siyaṃ evaṃviññāṇo siyaṃ anāgatamaddhānanti tattha nandiṃ na samanvāgameti evampi tassa natthi purekkhataṃ. {382.1} Athavā iti me cakkhu siyā anāgatamaddhānaṃ iti rūpāti appaṭiladdhassa paṭilābhāya cittaṃ na paṇidahati cetaso appaṇidhānapaccayā na tadabhinandati na tadabhinandanto evampi tassa natthi purekkhataṃ . iti me sotaṃ siyā anāgatamaddhānaṃ iti saddāti iti me ghānaṃ siyā anāgatamaddhānaṃ iti gandhāti iti me jivhā siyā anāgatamaddhānaṃ iti rasāti iti me kāyo siyā anāgatamaddhānaṃ iti phoṭṭhabbāti iti me mano siyā anāgatamaddhānaṃ iti dhammāti appaṭiladdhassa paṭilābhāya cittaṃ na paṇidahati cetaso appaṇidhānapaccayā na tadabhinandati na tadabhinandanto evampi tassa natthi purekkhataṃ. {382.2} Athavā imināhaṃ sīlena vā vattena vā tapena vā brahmacariyena vā devo vā bhavissāmi devaññataro vāti appaṭiladdhassa paṭilābhāya cittaṃ na paṇidahati cetaso appaṇidhānapaccayā na tadabhinandati na tadabhinandanto evampi tassa natthi purekkhataṃ. Tenāha bhagavā vītataṇho purā bhedā (ti bhagavā) pubbamantamanissito vemajjhe nupasaṅkheyyo tassa natthi purekkhatanti.

[383] Akkodhano asantāsī avikatthī akukkuco mantābhāṇī anuddhato sa ve vācāyato muni.