[390] Nirāsattī anāgate atītaṃ nānusocati vivekadassī phassesu diṭṭhīsu ca na niyyati.
[391] Nirāsattī anāgateti āsatti vuccati taṇhā yo rāgo sārāgo .pe. abhijjhā lobho akusalamūlaṃ . Yassesā āsatti taṇhā pahīnā samucchinnā vūpasantā paṭippassaddhā abhabbuppattikā ñāṇagginā daḍḍhāti evampi nirāsattī anāgate . athavā evaṃrūpo siyaṃ anāgatamaddhānanti tattha nandiṃ na samanvāgameti evaṃvedano siyaṃ evaṃsañño siyaṃ evaṃsaṅkhāro siyaṃ evaṃviññāṇo siyaṃ anāgatamaddhānanti tattha nandiṃ na samanvāgameti evampi nirāsattī anāgate . athavā iti me cakkhu siyā anāgatamaddhānaṃ iti rūpāti appaṭiladdhassa paṭilābhāya cittaṃ na Paṇidahati cetaso appaṇidhānapaccayā na tadabhinandati na tadabhinandanto evampi nirāsattī anāgate . iti me sotaṃ siyā anāgatamaddhānaṃ iti saddāti .pe. iti me mano siyā anāgatamaddhānaṃ iti dhammāti appaṭiladdhassa paṭilābhāya cittaṃ na paṇidahati cetaso appaṇidhānapaccayā na tadabhinandati na tadabhinandanto evampi nirāsattī anāgate . athavā imināhaṃ sīlena vā vattena vā tapena vā brahmacariyena vā devo vā bhavissāmi devaññataro vāti appaṭiladdhassa paṭilābhāya cittaṃ na paṇidahati cetaso appaṇidhānapaccayā na tadabhinandati na tadabhinandanto evampi nirāsattī anāgate.
[392] Atītaṃ nānusocatīti vipariṇataṃ vā vatthuṃ na socati vipariṇatamhi vā vatthusmiṃ na socati cakkhuṃ me vipariṇatanti na socati sotaṃ me ghānaṃ me jivhā me kāyo me rūpā me saddā me gandhā me rasā me phoṭṭhabbā me kulaṃ me gaṇaṃ me āvāso me lābho me yaso me pasaṃsā me sukhaṃ me cīvaraṃ me piṇḍapāto me senāsanaṃ me gilānapaccayabhesajjaparikkhāro me mātā me pitā me bhātā me bhaginī me putto me dhītā me mittāmaccā me ñātakā me sālohitā me vipariṇatāti na socati na kilamati na paridevati na urattāḷiṃ kandati na sammohaṃ āpajjatīti atītaṃ nānusocati.
[393] Vivekadassī phassesūti phassoti cakkhusamphasso sotasamphasso ghānasamphasso jivhāsamphasso kāyasamphasso manosamphasso adhivacanasamphasso paṭighasamphasso sukhavedanīyo samphasso dukkhavedanīyo samphasso adukkhamasukhavedanīyo samphasso kusalo phasso akusalo phasso abyākato phasso kāmāvacaro phasso rūpāvacaro phasso arūpāvacaro phasso suññato phasso animitto phasso appaṇihito phasso lokiyo phasso lokuttaro phasso atīto phasso anāgato phasso paccuppanno phasso yo evarūpo phasso phusanā samphusanā samphusitattaṃ ayaṃ vuccati phasso. {393.1} Vivekadassī phassesūti cakkhusamphassaṃ vivittaṃ passati attena vā attaniyena vā niccena vā dhuvena vā sassatena vā avipariṇāmadhammena vā . sotasamphassaṃ vivittaṃ passati . Ghānasamphassaṃ vivittaṃ passati . jivhāsamphassaṃ vivittaṃ passati . Kāyasamphassaṃ vivittaṃ passati . manosamphassaṃ vivittaṃ passati . Adhivacanasamphassaṃ vivittaṃ passati . paṭighasamphassaṃ vivittaṃ passati . Sukhavedanīyaṃ samphassaṃ . dukkhavedanīyaṃ samphassaṃ . adukkhamasukhavedanīyaṃ samphassaṃ . kusalaṃ phassaṃ . akusalaṃ phassaṃ . abyākataṃ phassaṃ . Kāmāvacaraṃ phassaṃ . rūpāvacaraṃ phassaṃ . arūpāvacaraṃ phassaṃ . lokiyaṃ phassaṃ . lokuttaraṃ phassaṃ vivittaṃ passati attena vā attaniyena vā niccena vā dhuvena vā sassatena vā avipariṇāmadhammena vā. Athavā atītaṃ phassaṃ anāgatehi ca phassehi paccuppannehi ca Phassehi vivittaṃ passati . anāgataṃ phassaṃ atītehi ca phassehi paccuppannehi ca phassehi vivittaṃ passati . paccuppannaṃ phassaṃ atītehi ca phassehi anāgatehi ca phassehi vivittaṃ passati . athavā ye te phassā ariyā anāsavā lokuttarā suññatapaṭisaṃyuttā te phasse vivitte passati rāgena dosena mohena kodhena upanāhena makkhena paḷāsena issāya macchariyena māyāya sāṭheyyena thambhena sārambhena mānena atimānena madena pamādena sabbakilesehi sabbaduccaritehi sabbadarathehi sabbapariḷāhehi sabbasantāpehi sabbākusalābhisaṅkhārehi vivitte passatīti vivekadassī phassesu.