[425] Atāri so visattikanti visattikā vuccati taṇhā yo rāgo sārāgo .pe. abhijjhā lobho akusalamūlaṃ . visattikāti kenatthena visattikā . visatāti visattikā . visālāti visattikā . Visaṭāti visattikā . visamāti visattikā . visakkatīti visattikā . Visaṃharatīti visattikā . visaṃvādikāti visattikā . visamūlāti visattikā . visaphalāti visattikā . visaparibhogāti visattikā . Visālā vā pana sā taṇhā rūpe sadde gandhe rase phoṭṭhabbe kule gaṇe āvāse .pe. diṭṭha suta muta viññātabbesu dhammesu visaṭā vitthatāti visattikā . atāri so visattikanti so imaṃ visattikaṃ taṇhaṃ atāri uttari pattari samatikkami vītivattatīti Atāri so visattikaṃ. Tenāha bhagavā taṃ brūmi upasantoti kāmesu anapekkhinaṃ ganthā tassa na vijjanti atāri so visattikanti.

[426] Na tassa puttā pasavo khettaṃ vatthuñca vijjati attaṃ vāpi nirattaṃ vā na tasmiṃ upalabbhati.

[427] Na tassa puttā pasavo khettaṃ vatthuñca vijjatīti nāti paṭikkhepo . tassāti arahato khīṇāsavassa . puttāti cattāro puttā attajo putto khettajo putto dinnako putto antevāsiko putto . pasavoti ajeḷakā kukkuṭasūkarā hatthigavāssavaḷavā . khettanti sālikkhettaṃ vīhikkhettaṃ muggakkhettaṃ māsakkhettaṃ yavakkhettaṃ godhūmakkhettaṃ tilakkhettaṃ . vatthunti gharavatthu koṭṭhakavatthu purevatthu pacchāvatthu ārāmavatthu vihāravatthu . Na tassa puttā pasavo khettaṃ vatthuñca vijjatīti tassa puttapariggaho vā pasupariggaho vā khettapariggaho vā vatthupariggaho vā natthi na santi na saṃvijjanti nupalabbhanti pahīnā samucchinnā vūpasantā paṭippassaddhā abhabbuppattikā ñāṇagginā daḍḍhāti na tassa puttā pasavo khettaṃ vatthuñca vijjati.

[428] Attaṃ vāpi nirattaṃ vā na tasmiṃ upalabbhatīti attāti sassatadiṭṭhi natthi nirattāti ucchedadiṭṭhi natthi attāti gahitaṃ natthi nirattāti muñcitabbaṃ natthi . yassa natthi gahitaṃ tassa Natthi muñcitabbaṃ yassa natthi muñcitabbaṃ tassa natthi gahitaṃ . Gahaṇamuñcanaṃ samatikkanto arahā vuḍḍhiparihāniṃ vītivatto . so vuṭṭhavāso ciṇṇacaraṇo .pe. natthi tassa punabbhavoti attaṃ vāpi nirattaṃ vā na tasmiṃ upalabbhati. Tenāha bhagavā na tassa puttā pasavo khettaṃ vatthuñca vijjati attaṃ vāpi nirattaṃ vā na tasmiṃ upalabbhatīti.