[429] Yena [1]- vajjuṃ puthujjanā atho samaṇabrāhmaṇā taṃ tassa apurekkhataṃ tasmā vādesu nejati.

[430] Yena vajjuṃ puthujjanā atho samaṇabrāhmaṇāti puthujjanāti kenatthena puthujjanā . puthu kilese janentīti puthujjanā . puthu avihatasakkāyadiṭṭhikāti puthujjanā . puthu satthārānaṃ mukhullokikāti puthujjanā . puthu sabbagatīhi āvunitāti puthujjanā . puthu nānābhisaṅkhārehi abhisaṅkharontīti puthujjanā . puthu nānāoghehi vuyhantīti puthujjanā . puthu nānāsantāpehi santappentīti puthujjanā . puthu nānāpariḷāhehi paridayhantīti puthujjanā . puthu pañcasu kāmaguṇesu rattā giddhā gadhitā mucchitā ajjhopannā laggā laggitā palibuddhāti puthujjanā . puthu pañcahi nīvaraṇehi āvuṭā nivuṭā ophuṭā pihitā paṭicchannā paṭikujjitāti puthujjanā . Samaṇāti yekeci ito bahiddhā paribbājupagatā paribbājasamāpannā . Brāhmaṇāti yekeci bhovādikā . yena vajjuṃ puthujjanā atho Samaṇabrāhmaṇāti puthujjanā yena [1]- rāgena vadeyyuṃ yena dosena vadeyyuṃ yena mohena vadeyyuṃ yena mānena vadeyyuṃ yāya diṭṭhiyā vadeyyuṃ yena uddhaccena vadeyyuṃ yāya vicikicchāya vadeyyuṃ yehi anusayehi vadeyyuṃ rattoti vā duṭṭhoti vā mūḷhoti vā vinibandhoti vā parāmaṭṭhoti vā vikkhepagatoti vā aniṭṭhaṅgatoti vā thāmagatoti vā . te abhisaṅkhārā pahīnā abhisaṅkhārānaṃ pahīnattā gatiyo yena vadeyyuṃ nerayikoti vā tiracchānayonikoti vā pittivisayikoti vā manussoti vā devoti vā rūpīti vā arūpīti vā saññīti vā asaññīti vā nevasaññīnāsaññīti vā . so hetu natthi paccayo natthi kāraṇaṃ natthi yena vadeyyuṃ katheyyuṃ bhaṇeyyuṃ dīpayeyyuṃ vohareyyunti yena vajjuṃ puthujjanā atho samaṇabrāhmaṇā.

[431] Taṃ tassa apurekkhanti tassāti arahato khīṇāsavassa . Purekkhāroti dve purekkhārā taṇhāpurekkhāro ca diṭṭhipurekkhāro ca .pe. ayaṃ taṇhāpurekkhāro .pe. ayaṃ diṭṭhipurekkhāro . Tassa taṇhāpurekkhāro pahīno diṭṭhipurekkhāro paṭinissaṭṭho taṇhāpurekkhārassa pahīnattā diṭṭhipurekkhārassa paṭinissaṭṭhattā na taṇhaṃ vā diṭṭhiṃ vā purato katvā carati na taṇhādhajo na taṇhāketu na taṇhādhipateyyo na diṭṭhiddhajo na diṭṭhiketu na diṭṭhādhipateyyo na taṇhāya vā [2]- diṭṭhiyā vā Parivārito caratīti taṃ tassa apurekkhataṃ.