[508] Aññantaṃ pucchāma tadiṅgha brūhīti aññantaṃ pucchāma aññantaṃ yācāma aññantaṃ ajjhesāma aññantaṃ pasādema uttariṃ taṃ pucchāma . tadiṅgha brūhīti iṅgha brūhi ācikkha desehi paññāpehi paṭṭhapehi vivara vibhaja uttānīkarohi pakāsehīti aññantaṃ pucchāma tadiṅgha brūhi.

[509] Ettāvataggaṃ no vadanti heke yakkhassa suddhiṃ idha paṇḍitāseti eke samaṇabrāhmaṇā ettāvatā arūpasamāpattiyā aggaṃ seṭṭhaṃ viseṭṭhaṃ pāmokkhaṃ uttamaṃ pavaraṃ vadanti kathenti bhaṇanti dīpayanti voharanti . yakkhassāti sattassa narassa mānavassa posassa puggalassa jīvassa jātussa jantussa indagussa manujassa . suddhinti suddhiṃ visuddhiṃ parisuddhiṃ muttiṃ vimuttiṃ parimuttiṃ . idha paṇḍitāseti idha paṇḍitavādā dhīravādā ñāṇavādā hetuvādā lakkhaṇavādā kāraṇavādā ṭhānavādā sakāya laddhiyāti ettāvataggaṃ No vadanti heke yakkhassa suddhiṃ idha paṇḍitāse.

[510] Udāhu aññaṃpi vadanti ettoti udāhu eke samaṇabrāhmaṇā etā arūpasamāpattiyo atikkamitvā samatikkamitvā vītivattitvā etto arūpato aññaṃ uttariṃ yakkhassa suddhiṃ visuddhiṃ parisuddhiṃ muttiṃ vimuttiṃ parimuttiṃ vadanti kathenti bhaṇanti dīpayanti voharantīti udāhu aññaṃpi vadanti etto. Tenāha so nimmito yantaṃ apucchimha akittayī no aññantaṃ pucchāma tadiṅgha brūhi ettāvataggaṃ no vadanti heke yakkhassa suddhiṃ idha paṇḍitāse udāhu aññaṃpi vadanti ettoti.

[511] Ettāvataggaṃpi vadanti heke yakkhassa suddhiṃ idha paṇḍitāse tesaṃ puneke samayaṃ vadanti anupādisese kusalāvadānā.