[512] Ettāvataggaṃpi vadanti heke yakkhassa suddhiṃ idha paṇḍitāseti santeke samaṇabrāhmaṇā sassatavādā ettāvatā arūpasamāpattiyā aggaṃ seṭṭhaṃ viseṭṭhaṃ pāmokkhaṃ uttamaṃ pavaraṃ vadanti kathenti bhaṇanti dīpayanti voharanti . yakkhassāti sattassa narassa mānavassa posassa puggalassa jīvassa jātussa jantussa Indagussa manujassa . suddhinti suddhiṃ visuddhiṃ parisuddhiṃ muttiṃ vimuttiṃ parimuttiṃ . idha paṇḍitāseti idha paṇḍitavādā dhīravādā ñāṇavādā hetuvādā lakkhaṇavādā kāraṇavādā ṭhānavādā sakāya laddhiyāti ettāvataggaṃpi vadanti heke yakkhassa suddhiṃ idha paṇḍitāse.

[513] Tesaṃ puneke samayaṃ vadanti anupādisese kusalāvadānāti tesaṃyeva samaṇabrāhmaṇānaṃ eke samaṇabrāhmaṇā ucchedavādā bhavatajjitā vibhavaṃ abhinandanti te sattassa samaṃ upasamaṃ vūpasamaṃ nirodhaṃ paṭippassaddhaṃ vadanti yato kira bho ayaṃ attā kāyassa bhedā ucchijjati vinassati na hoti parammaraṇā ettāvatā anupādisesoti . Kusalāvadānāti kusalavādā paṇḍitavādā dhīravādā ñāṇavādā hetuvādā lakkhaṇavādā kāraṇavādā ṭhānavādā sakāya laddhiyāti tesaṃ puneke samayaṃ vadanti anupādisese kusalāvadānā . tenāha bhagavā ettāvataggaṃpi vadanti heke yakkhassa suddhiṃ idha paṇḍitāse tesaṃ puneke samayaṃ vadanti anupādisese kusalāvadānāti.

[514] Ete ca ñatvā upanissitāti ñatvā munī nissaye so vimaṃsī Ñatvā vimutto na vivādameti bhavābhavāya na sameti dhīro.

[515] Ete ca ñatvā upanissitāti eteti diṭṭhigatike . Upanissitāti sassatadiṭṭhinissitāti ñatvā ucchedadiṭṭhinissitāti ñatvā sassatucchedadiṭṭhinissitāti ñatvā jānitvā tulayitvā tīrayitvā vibhāvayitvā vibhūtaṃ katvāti ete ca ñatvā upanissitāti.