[535] Sandiṭṭhiyā ce pana vīvadātāti sakāya diṭṭhiyā sakāya khantiyā sakāya ruciyā sakāya laddhiyā vīvadātā pariyodātā asaṅkiliṭṭhāti sandiṭṭhiyā ce pana vīvadātā.

[536] Saṃsuddhapaññā kusalā matīmāti suddhapaññā visuddhapaññā parisuddhapaññā vodātapaññā pariyodātapaññā . Athavā suddhadassanā visuddhadassanā parisuddhadassanā vodātadassanā pariyodātadassanāti saṃsuddhapaññā . kusalāti kusalā paṇḍitā paññavanto buddhimanto ñāṇino vibhāvino medhāvinoti saṃsuddhapaññā kusalā . matīmāti matimā paṇḍitā paññavanto buddhimanto Ñāṇino vibhāvino medhāvinoti saṃsuddhapaññā kusalā matīmā.

[537] Na tesaṃ koci parihīnapaññoti tesaṃ samaṇabrāhmaṇānaṃ na koci hīnapañño nihīnapañño omakapañño lāmakapañño jatukkapañño parittapañño [1]- . athavā sabbeva aggapaññā seṭṭhapaññā viseṭṭhapaññā pāmokkhapaññā uttamapaññā pavarapaññāti na tesaṃ koci parihīnapañño.

[538] Diṭṭhī hi tesaṃpi tathā samattāti tesaṃ samaṇabrāhmaṇānaṃ diṭṭhi tathā samattā samādinnā gahitā parāmaṭṭhā abhiniviṭṭhā ajjhositā adhimuttāti diṭṭhī hi tesaṃpi tathā samattā . Tenāha bhagavā sandiṭṭhiyā ce pana vīvadātā saṃsuddhapaññā kusalā matīmā na tesaṃ koci parihīnapañño diṭṭhī hi tesaṃpi tathā samattāti.