[539] Na vāhametaṃ tathivanti brūmi yamāhu bālā mithu aññamaññaṃ sakaṃ sakaṃ diṭṭhimakaṃsu saccaṃ tasmā hi bāloti paraṃ dahanti.

[540] Na vāhametaṃ tathivanti brūmīti nāti paṭikkhepo . Etanti dvāsaṭṭhidiṭṭhigatanti nāhaṃ etaṃ tathaṃ tacchaṃ bhūtaṃ yāthāvaṃ Aviparītanti brūmi ācikkhāmi desemi paññāpemi paṭṭhapemi vivarāmi vibhajāmi uttānīkaromi pakāsemīti na vāhametaṃ tathivanti brūmi.

[541] Yamāhu bālā mithu aññamaññanti mithūti dve janā dve kalahakārakā dve bhaṇḍanakārakā dve bhassakārakā dve vivādakārakā dve adhikaraṇakārakā dve vādino dve sallāpakā . Te aññamaññaṃ bālo hīno nihīno omako lāmako jatukko parittoti evamāhaṃsu evaṃ kathenti evaṃ bhaṇanti evaṃ dīpayanti evaṃ voharantīti yamāhu bālā mithu aññamaññaṃ.

[542] Sakaṃ sakaṃ diṭṭhimakaṃsu saccanti sassato loko idameva saccaṃ moghamaññanti sakaṃ sakaṃ diṭṭhimakaṃsu saccaṃ . asassato loko idameva saccaṃ moghamaññanti .pe. neva hoti na na hoti tathāgato parammaraṇā idameva saccaṃ moghamaññanti sakaṃ sakaṃ diṭṭhimakaṃsu saccaṃ.