[543] Tasmā hi bāloti paraṃ dahantīti tasmāti tasmā taṃkāraṇā taṃhetu tappaccayā taṃnidānā paraṃ bālo hīno nihīno omako lāmako jatukko parittoti dahanti passanti dakkhanti olokenti nijjhāyanti upaparikkhantīti tasmā hi bāloti paraṃ dahanti. Tenāha bhagavā na vāhametaṃ tathivanti brūmi yamāhu bālā mithu aññamaññaṃ Sakaṃ sakaṃ diṭṭhimakaṃsu saccaṃ tasmā hi bāloti paraṃ dahantīti.

[544] Yamāhu saccaṃ tathivanti eke tamāhu aññepi tucchaṃ musāti evampi viggayha vivādayanti kasmā na ekaṃ samaṇā vadanti.

[545] Yamāhu saccaṃ tathivanti eketi yaṃ dhammaṃ diṭṭhiṃ paṭipadaṃ maggaṃ eke samaṇabrāhmaṇā idaṃ saccaṃ tacchaṃ bhūtaṃ yāthāvaṃ aviparītanti evamāhaṃsu evaṃ kathenti evaṃ bhaṇanti evaṃ dīpayanti evaṃ voharantīti yamāhu saccaṃ tathivanti eke.

[546] Tamāhu aññepi tucchaṃ musātīti tameva dhammaṃ diṭṭhiṃ paṭipadaṃ maggaṃ eke samaṇabrāhmaṇā etaṃ tucchaṃ etaṃ musā etaṃ abhūtaṃ etaṃ alikaṃ etaṃ ayāthāvanti evamāhaṃsu evaṃ kathenti evaṃ bhaṇanti evaṃ dīpayanti evaṃ voharantīti tamāhu aññepi tucchaṃ musāti.