[547] Evampi viggayha vivādayantīti evaṃ gahetvā uggahetvā gaṇhitvā parāmasitvā abhinivisitvā vivādayanti kalahaṃ karonti bhaṇḍanaṃ karonti viggahaṃ karonti vivādaṃ karonti medhagaṃ karonti na tvaṃ imaṃ dhammavinayaṃ ājānāsi .pe. nibbedhehi vā sace pahosīti evampi viggayha vivādayanti.

[548] Kasmā na ekaṃ samaṇā vadantīti kasmāti kasmā kiṃkāraṇā kiṃhetu kiṃpaccayā kiṃnidānā kiṃsamudayā kiṃjātikā kiṃpabhavā na ekaṃ vadanti nānā vadanti vividhaṃ vadanti aññoññaṃ vadanti puthu vadanti kathenti bhaṇanti dīpayanti voharantīti kasmā na ekaṃ samaṇā vadanti. Tenāha so nimmito yamāhu saccaṃ tathivanti eke tamāhu aññepi tucchaṃ musāti evampi viggayha vivādayanti kasmā na ekaṃ samaṇā vadantīti.

[549] Ekaṃ hi saccaṃ na dutīyamatthi yasmiṃ pajā no vivade pajānaṃ nānā te saccāni sayaṃ thunanti tasmā na ekaṃ samaṇā vadanti.

[550] Ekaṃ hi saccaṃ na dutīyamatthīti ekaṃ saccaṃ vuccati dukkhanirodho nibbānaṃ yo so sabbasaṅkhārasamatho sabbūpadhipaṭinissaggo taṇhakkhayo virāgo nirodho nibbānaṃ . athavā ekaṃ saccaṃ vuccati maggasaccaṃ niyyānasaccaṃ dukkhanirodhagāminī paṭipadā ariyo aṭṭhaṅgiko maggo seyyathīdaṃ sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhīti ekaṃ hi saccaṃ na dutīyamatthi.