[551] Yasmiṃ pajā no vivade pajānanti yasminti yamhi sacce. Pajāti sattādhivacanaṃ . pajā yaṃ saccaṃ pajānantā ājānantā vijānantā paṭivijānantā paṭivijjhantā na kalahaṃ kareyya na bhaṇḍanaṃ kareyya na viggahaṃ kareyya na vivādaṃ kareyya na medhagaṃ kareyya kalahaṃ bhaṇḍanaṃ viggahaṃ vivādaṃ medhagaṃ pajaheyya vinodeyya byantīkareyya anabhāvaṅgameyyāti yasmiṃ pajā no vivade pajānaṃ.

[552] Nānā te saccāni sayaṃ thunantīti nānā te saccāni sayaṃ thunanti vadanti kathenti bhaṇanti dīpayanti voharanti sassato loko idameva saccaṃ moghamaññanti sayaṃ thunanti vadanti kathenti bhaṇanti dīpayanti voharanti asassato loko .pe. neva hoti na na hoti tathāgato parammaraṇā idameva saccaṃ moghamaññanti sayaṃ thunanti vadanti kathenti bhaṇanti dīpayanti voharantīti nānā te saccāni sayaṃ thunanti.

[553] Tasmā na ekaṃ samaṇā vadantīti tasmāti tasmā taṃkāraṇā taṃhetu tappaccayā taṃnidānā na ekaṃ vadanti nānā vadanti vividhaṃ vadanti aññoññaṃ vadanti puthu vadanti kathenti bhaṇanti dīpayanti voharantīti tasmā na ekaṃ samaṇā vadanti . Tenāha bhagavā ekaṃ hi saccaṃ na dutīyamatthi yasmiṃ pajā no vivade pajānaṃ Nānā te saccāni sayaṃ thunanti tasmā na ekaṃ samaṇā vadantīti.

[554] Kasmā nu saccāni vadanti nānā pavādiyāse kusalāvadānā saccāni suttāni bahūni nānā udāhu te takkamanussaranti.