[563] Diṭṭhe sute sīlavate mute vā ete ca nissāya vimānadassī vinicchaye ṭhatvā pahassamāno bālo paro akusaloti cāha.

[564] Diṭṭhe sute sīlavate mute vā ete ca nissāya vimānadassīti diṭṭhaṃ vā diṭṭhasuddhiṃ vā sutaṃ vā sutasuddhiṃ vā sīlaṃ vā sīlasuddhiṃ vā vattaṃ vā vattasuddhiṃ vā mutaṃ vā mutasuddhiṃ vā nissāya upanissāya gaṇhitvā parāmasitvā abhinivisitvāti diṭṭhe sute sīlavate mute vā . ete ca nissāya vimānadassīti na sammānetītipi vimānadassī . athavā domanassaṃ janetītipi vimānadassīti diṭṭhe sute sīlavate mute vā ete ca nissāya vimānadassī.

[565] Vinicchaye ṭhatvā pahassamānoti vinicchayā vuccanti dvāsaṭṭhī diṭṭhigatāni vinicchitadiṭṭhiyā ṭhatvā patiṭṭhahitvā gaṇhitvā parāmasitvā abhinivisitvāti vinicchaye ṭhatvā . Pahassamānoti tuṭṭho hoti haṭṭho pahaṭṭho attamano paripuṇṇasaṅkappo . athavā dantavidaṃsakaṃ hassamānoti vinicchaye ṭhatvā pahassamāno.

[566] Bālo paro akusaloti cāhāti paro bālo hīno nihīno omako lāmako jatukko paritto akusalo aviddhā avijjāgato añāṇī avibhāvī duppaññoti evamāha evaṃ katheti evaṃ bhaṇati evaṃ dīpayati evaṃ voharatīti bālo paro akusaloti cāha. Tenāha bhagavā Diṭṭhe sute sīlavate mute vā ete ca nissāya vimānadassī vinicchaye ṭhatvā pahassamāno bālo paro akusaloti cāhāti.