[567] Yeneva bāloti paraṃ dahāti tenātumānaṃ kusaloti cāha sayamattanā so kusalovadāno aññaṃ vimāneti tatheva pāvā.

[568] Yeneva bāloti paraṃ dahātīti yena hetunā yena paccayena yena kāraṇena yena pabhavena paraṃ bālato hīnato nihīnato omakato lāmakato jatukkato parittato dahati passati dakkhati oloketi nijjhāyati upaparikkhatīti yeneva bāloti paraṃ dahāti.

[569] Tenātumānaṃ kusaloti cāhāti ātumā vuccati attā. Sopi teneva hetunā tena paccayena tena kāraṇena tena pabhavena attānaṃ āha ahamasmi kusalo paṇḍito paññavā buddhimā ñāṇī vibhāvī medhāvīti tenātumānaṃ kusaloti cāha.

[570] Sayamattanā so kusalovadānoti sayaṃ attānaṃ kusalavādo paṇḍitavādo dhīravādo ñāṇavādo hetuvādo lakkhaṇavādo kāraṇavādo ṭhānavādo sakāya laddhiyāti sayamattanā so kusalovadāno.