[571] Aññaṃ vimāneti tatheva pāvāti na sammānetītipi aññaṃ vimāneti . athavā domanassaṃ janetītipi aññaṃ vimāneti . Tatheva pāvāti tatheva taṃ diṭṭhigataṃ pāvadati itipāyaṃ puggalo micchādiṭṭhiko viparītadassanoti aññaṃ vimāneti tatheva pāvā . Tenāha bhagavā yeneva bāloti paraṃ dahāti tenātumānaṃ kusaloti cāha sayamattanā so kusalovadāno aññaṃ vimāneti tatheva pāvāti.

[572] Atīsaraṃdiṭṭhiyā so samatto mānena matto paripuṇṇamānī sayameva sāmaṃ manasābhisitto diṭṭhī hi sā tassa tathā samattā.

[573] Atīsaraṃdiṭṭhiyā so samattoti atisāradiṭṭhiyo vuccanti dvāsaṭṭhī diṭṭhigatāni . kiṃkāraṇā atisāradiṭṭhiyo vuccanti dvāsaṭṭhī diṭṭhigatāni . sabbā tā diṭṭhiyo kāraṇātikkantā lakkhaṇātikkantā hīnātikkantā taṃkāraṇā atisāradiṭṭhiyo vuccanti dvāsaṭṭhī diṭṭhigatāni . sabbepi titthiyā atisāradiṭṭhiyā . Kiṃkāraṇā sabbepi titthiyā atisāradiṭṭhiyā . te aññamaññaṃ atikkamitvā samatikkamitvā vītivattetvā diṭṭhigatāni janenti Sañjanenti nibbattenti abhinibbattenti taṃkāraṇā sabbepi titthiyā atisāradiṭṭhiyā . so samattoti atisāradiṭṭhiyā samatto paripuṇṇo anomoti atīsaraṃdiṭṭhiyā so samatto.

[574] Mānena matto paripuṇṇamānīti sakāya diṭṭhiyā mānena matto pamatto ummatto adhimattoti mānena matto . Paripuṇṇamānīti paripuṇṇamānī samattamānī anomamānīti mānena matto paripuṇṇamānī.